Smetona Antanas (10.08.1874, Užulenis — 9.01.1944, Klivlend /AÜŠ/) — litvalaine valdkundmez', kel'tedomez', kirjutai. Lopi augotižškolan Taujenai-küläs, sid' otli urokoid Ukmerges da Liepajas. Vl 1893 lopi progimnazijan Palangas i tuli omendamhas Jelgavan gimnazijaha. Tegihe patriotižen peitorganizacijan ühtnijaks. Protestui ortodoksaližen jumalankodin ülävaldan vaste; sen tagut oli kükstud gimnazijaspäi. Vl. 1902 lopi Piterin universitetan juridižen tedokundan, sid' radoi Mabankas Vil'nüsas. Vl. 1907 ühtes Tumas-Vaižgantasanke pani "Viltis" ("Toiv")-aiglehtesen alusen, a vl. 1914 — "Vairas" ("Oigenzim")-aiglehtesen alusen. Radoi "Vilniaus žinios" ("Vil'nüsan uzištused")-lehteses, pordon aigad — "Lietuvos ūkininkas" ("Litvanman Ižandoitai")-nedal'lehtesen redaktoran. Vozil 1902 — 1907 oli Litvan demokratižen partijan ühtnijan; taughui litvalaižiden suimas (4 — 5.12.1905), kudamb pakiči Litvanman avtonomijad. Ezmäižen mail'mansodan aigan ohjanzi hüväntegijal rahištol.
Litvaižel konferencijal (18 — 22.09.1917) Smetonan Antanasad valitihe Litvanman nevondkunha. Vlpäi 1917 — Litvanman nevondkundan pämez'. 18.02.1918 Litvanman nevonkund om tedotanu Litvanman ripmatomut.
4.04.1919 — 19.04.1920 A. Smetona oli Litvanman ezmäižen prezidentan. Vozil 1920 — 1924 hän oli Rahvahaližen progressan partijanpämehen, taughui Litvanman ambujiden ühtištusen (Lietuvos šaulių sąjunga) rados. Vl. 1924 oli ühten Tautininkoiden partijan organizatorišpäi. Vozil 1923 — 1927 openzi Litvan universitetas etikad, amušt filosofijad, litvan kelen stilistikad. Vlpäi 1926— docent, vlpäi 1932— filosofijan doktor.17.12.1926, valdkundan kumaidusen jäl'ghe, möst tegihe Litvanman prezidentaks. Smetonad valiteldihe prezidentaks udes vozil 1931 da 1938. 14.06.1940, Nevondkundailžen Ühtištusen okkupacijan päiväl, pageni Germanijanmaha, sid' ajoi Šveicarijanmaha i ÜAŠhe.
Sai surman lämoipalon aigan Klivlendas (Ohajo-štatas).
